कृष्ण रावल/प्रमुख कार्यकारी अधिकृत

हाम्रो संस्था एक सुदृढ, विश्वसनीय तथा प्रतिष्ठित वित्तीय सहकारी संस्थाको रूपमा स्थापित भइसकेको तथ्य यहाँहरू समक्ष सर्वविदित नै छ। सदस्यहरूको निरन्तर विश्वास, पारदर्शी कार्यशैली, वित्तीय अनुशासन र गुणस्तरीय सेवा प्रवाहका कारण संस्थाले आफ्नो अलग पहिचान निर्माण गर्न सफल भएको छ। यस उपलब्धिलाई अझ सुदृढ गर्दै संस्थालाई आधुनिक, प्रविधिमैत्री र दिगो वित्तीय संस्थाका रूपमा रूपान्तरण गर्ने हाम्रो निरन्तर प्रयास रहेको छ। वर्तमान प्रतिस्पर्धात्मक वित्तीय परिप्रेक्ष्यलाई मध्यनजर गर्दै संस्थागत सुदृढीकरण, जोखिम व्यवस्थापनको प्रभावकारी कार्यान्वयन, आन्तरिक नियन्त्रण प्रणालीको मजबुतीकरण तथा सेवा प्रवाहमा नवीनता ल्याउने कार्यलाई उच्च प्राथमिकतामा राखिएको छ। डिजिटल बैंकिङ सेवा विस्तार तथा प्रविधिको अधिकतम उपयोगमार्फत सदस्यहरूलाई छिटो–छरितो, सुरक्षित र सहज सेवा प्रदान गर्ने दिशामा हामी अग्रसर छौं। सदस्यहरूको बचत सुरक्षा, गुणस्तरीय कर्जा लगानी तथा वित्तीय अनुशासनलाई केन्द्रमा राख्दै उत्पादनशील, आयमूलक, रोजगारी सिर्जना गर्ने, व्यवसायिक तथा उद्यमशीलता प्रवर्द्धन गर्ने क्षेत्रमा लगानी विस्तार गर्ने नीति अवलम्बन गरिएको छ।